Улаан-Үдэ хотодо «Алас Дурнын зүгтэ бүтээгдэһэн: контентһээ ниислэл болотор» гэһэн зохёохы аргануудай уласхоорондын форум болобо.
Тэрэ хадаа майн 21-һээ 23 болотор үнгэрөө. Хэмжээ ябуулгада 4 мянга гаран хүн оролсобо, харин бултан дээрээ хабаадалсаһан зон - 20 гаран мянга Улаан-Үдэ хотын ажаһуугшад юм. Форумда хадаа Россиин 40 тойрогуудай мүн 10 гүрэнүүдэй олон олзын хэрэг ябуулагшад, дархашуул, уран зураашад, хүгшэмшэд, кино буулгагшад ерэбэ.
- Манай зохёохы ажалай, багашье, ехэшье олзын хэрэг ябуулдаг зон энэ ажалнай шухала, нютаг дээрэ хүгжэхэ боломжонуудтай, теэд удаан хугасаа соо арад зондо хэрэгтэй байха гэжэ ойлгобо. Мүнөө хадаа зохёохы ажалай таһаг Буряад Уласай хүгжэлтын үшөө нэгэн гол зүг болоно юм. Бидэ бултадаа мэдэнэбди, ашагта малтамалнуудые олохо ехэ хэрэгүүд бии гэжэ. Харин иимэ зохёохы арганууднай бага һуурин нютагууд соо бүтээгдэхээр болоно. Энэмнай хадаа хото аймагуудаар ажаһуудаг мянгаад зон. Бултанай һонирхол татаха болоно. Тиимэһээ, ажалаа ябуулая, мүнгэ оложо, урагшаа сэхэ ябажа, жаргалтай байжа шадая даа, - гэжэ толгойлогшо Алексей Цыденов хэлэбэ.
Ородой Холбоото Уласай Алас Дурна ба Арктика хүгжөөлгын сайдай орлогшо Эльвира Нургалиева форумай эмхидхэгшэдтэ баяраа мэдүүлбэ: «Алас Дурна ба Арктика хүгжөөлгын танхимай хабаадагшадые амаршалха байнаб. Ехэ ажал ябуулагдажа, энэ уулзалзгамнай болоһон байна. Мүн тиихэдэ Буряад Уласай танхимые тэмдэглэхэ байнаб. Таанарай зүгһөө энэ форум үнгэргэхэ арганууд лэ һайнаар бүтээгдэһэн байна».
Тэрэ хадаа үшөө жэлдээ нэгэшье удаа сугларжа байхада ехэ шухала гэжэ тэмдэглэбэ. Юундэб гэхэдэ, бэе бэеэ сэхэ хаража, танилсажа, хөөрэлдэжэ, һанамжануудаараа, сэдьхэл һанаагаараа, хубаалсажа, сугтаа бүтээхэ хэрэгүүд тухай хэлсэжэ байхада гое юум ааб даа. Энэ жэлдэ форум тиихэдэ удхануудаар, хөөрэлдөөнүүдээр, олон аргануудаар баян байба юм.
Форумай гол дүнгүүд
Алас Дурна зүгэй аяншалгын, зохёохы ажалай, ажахын байдалай талаар 30 тэрбум түхэригтэ зүбшөөлтэнүүд баталагданхай: шэнэ кино, соелой бүтээлнүүд бии болохо. Алас Дурна зүгтэ түрүүшэнхиеэ уласхоорондын медиа худалдажа абаха арганууд нээгдээ. Тэнжэ хадаа 50 харуулагдаһан кинонууд соо юһэнэйнь олондо тараажа харуулха эрхи абагдажа, зүбшөөрэл баталагдаба.
Худалдаанай талмай дээрэ буряадай уран зураашадай ажалнууд шэнэ эзэнгүүдтэй боложо шадаа.
Программа ба хабаадагшад
Форумай программа хадаа ехэл баян байгаа - тэндэ хэлэлсээнгүүд, мастер-классууд, түсэлнүүдэй хөөрэлдөөнгүүд, худалдаанай брэнднүүдтай танилсуулганууд, мүн лэ кино, мода, архитекутура гэһэн түсэбүүдээр хэмжээ ябуулганууд болоо.
Тиихэдэ онсо анхарал хадаа мэдээжэ найруулагша, зүжэгшэн Федор Бондарчук татаа. Тэрэ хадаа киногой хүгжэлтэ, кинотеатрнуудай ажал, богони метр, залуушуулай һонирхол тухай хөөрөө.
Тиихэдэ «Амтатай» гэжэ фестиваль энэ хэмжээ ябуулга соо оробо. Эндэ ардай заншал ба мүнөө үеын арганууд нэгэдэбэ. Фестивалиин үдэрнүүд соо 1000 гаран бууза шэмхэгдээ. Хабаадагшадай дунда Алексей Чадов гэһэн мэдээжэ зүжэгшэн байгаа. Тэрэ хадаа Фёдор Бондарчуктай сугтаа бууза бэлдэжэ үзөө. Гастрофестиваль хадаа мянгаад зониие суглуулжа, залуу хүгшэниие нэгэдүүлжэ шадаа.
Возрастное ограничение 0+
