Декабриин 1-дэ Федерациин Зүблэл соо Буряадай толгойлогшо Алексей Цыденов, Ростехэй юрэнхы захирал Сергей Чемезов, «Защитники Отечества» түбэй түрүүлэгшэ Анна Цивилева гэгшэд гурбан зүгэй зүбшөөрэл баталуулба. Тэрэ хадаа СВО-до ябаһан сэрэгшэдтэ һэргээлгын түб нээгдэжэ, бэеэ шархатуулһан зондо үндэр шанартай протезнуудые үгэхэ хэрэг ябуулагдаха.
- Юрий Петрович Трутневэй туһаламжаар юрэнхылэгшын Алас Дурнын субисидиин талаар Буряад Улас иимэ түбэй барилгада мүнгэндэ хүртэһэн байна. 2026 ондо 217 сая түхэриг бидэндэ үгэгдэнэ. Бидэ байшан барижа, бүхы хажуудахи оршонгыень бэлдэхэбди, - гэжэ Цыденов өөрынгөө телеграм-субаг соогоо бэшэбэ.
Бүхы хэрэгсэлнүүдые түб хадаа Ортопедиин шэнэ аргануудай түбһөө абаха. Ростехэй туһаламжаар тэндэ оршон үеын арганууд, бэлдэлгэнүүд, протез хэхэ хэрэгсэлнүүд, мүн һургуули гараһан эмшэнэр, мэргэжэлтэд бии болохо юм.
- Энэ хадаа бүхэроссиин шанарай нэгэ эрилтэтэй түб байха, - гэжэ толгойлогшо тэмдэглэнэ. - Манай хүбүүд тэндэ шэнэ үеын протез абажа шадаха, бүхы туһаламжа гэртээ, гэр бүлэтэйгээ хамта байгаад, абажа шадаха. Бэеын тамираар һорижо, һайжаржа, шэнэ протезнуудаар ажалжа һураха - эндээ, гэртээ, Буряад Уластаа.
«Байкал-Daily»-гэй мэдүүлһээр, Буряадта иимэ түбэй нээгдэхэ тухай 2025 оной июнь һара соо мэдэгдээ. Тэндэ Алексей Цыденов ЦИТО федеральна түб соо ошоһон байна. Барилгада мүнгэ хадаа октябрь һара соо гаргаһан байна. ЦИТО-гэй салбари Алас Дурнын зүгтэ түрүүшэнхи болохо байна.
