Энэ мүрысѳѳн буряад хэлэ зааха шэнэ онол аргануудые нэбтэрүүлхэ, үүргыень дээшэлүүлхэ хэмжээнүүдые дэмжэхэ зорилготой. Социальна ролик, богонихон фильм, видео-хэшээл, хүүгэдэй наадануудые бии болгохо гэһэн зорилго мүн лэ урдаа баримталанхай. Интернет, гар утаһан, компьютер гэхэ мэтэ оньһото мэдээсэлэй технологидо хабаатай янза бүриин проектнүүдые хамта олоноороо зохёон бэлдэжэ, тэдэнээ хэрэг дээрээ бэелүүлхэ арга олохо гэһэн хүсэл баһал бии.
Мүрысѳѳн, имагтал, хүн зоной ухаан бодолдоо буйлуулжа байһан түсэб бодото дээрэнь бэелүүлхэ боломжо мүн болоно. Мүрысѳѳндэ хабаадахаар эрмэлзэһэн хүнүүдтэ мэргэн зүбшѳѳлнүүд үгтэхэ, хэдэн хэшээл, семинарнууд эмхидхэгдэхэ. Өөрын зохёоһон проект түсэл тухайгаа хѳѳрэжэ үгэхэ, жюриин урда ажалаа хамгаалха талаар тусхай заабаринууд үгтэхэ. Иимэрхүү ажалай дүнгѳѳр мүрысѳѳндэ шалгаран эрхимлэһэн удха шанартай түсэлнүүд (проектнүүд) мүнгэн дэмжэлгэдэ хүртэхэ жэшээтэй.
Энэ жэлэй эхиндэ «Найдал» жаса иимэ мүрысѳѳ түрүүшынхиеэ үнгэргэһэн юм. Тиихэдэ 70 гаран хүн тэрэ мүрысѳѳндэ хабаадаа һэн. Мүрысѳѳнэй дүнгѳѳр 18 түсэлнүүд дэмжэлгэдэ хүртѳѳ, тэдэнэй 7-ниинь мүнѳѳ дээрээ амжалтатай бэелүүлэгдэһэн байна. Екатерина Балданова «Юртэмсын шубуун» гэжэ ѳѳрын зурагуудаар хэдэн открытка гаргаа, Санжи Шагжин «Будамшуу» гэжэ хүүгэдэй сэтгүүл-раскраска гаргажа байна, Ольга Гармаева, Людмила Аюшеева хоёр хармаанай ород-буряад толи, Максим Дашинимаев «АТВ-Байгал» гэжэ телеканалда Жаргал Бадагаровтай буряад хэлэнэй видео-хэшээл ябуулна, Янжима Данзанова «Заахан бэрхэ» гэжэ онол заабариин ном бэлдээд, заахан хүүгэдтэ буряад хэлэ заажа байна, Баир Гомбоев «Үльгэршэнэй һэеы гэр» зохёожо, тэндээ үльгэр домог түүрээнэ, Чимита Дамдинова шагай наадан дээрэ хүүгэдтэ буряад хэлэ заана. Намжилма Бальжинимаевагай буряад хэлэн дээрэ нээһэн интернет сайт олон уншагшадай һайшалда хүртэнхэй.
Мүрысѳѳнэй юрэнхы дүрим иимэ сайт соо үгтэнхэй: http://vk.com/fondnaidal, тиихэдэ мүрысѳѳ залан хүтэлэгшэ Дондокова Түмэнын гар утаһанай дугаар руу хонходожо болоно: 8-908-596-64-87, холбохо e-mail-хаяг: fond-naidal@mail.ru.
