Тэрэ хэлсээнэй ёһоор, уласай Байгал шадарай аймагта пеллет-түлишэ бүтээдэг завод баригдаха юм. Энэ хэлсээнэй дансада Буряадай Толгойлогшо Алексей Цыденов ба «Монпеллет» ажахын ахамад захирал У. Энхбилэг хоёр гараа табиба.
Энэ завод жэлэй туршада 120 тонно пеллет-түлишэ үйлэдбэрилхэ шадалтай. Монголой засаг түрын май һарада баталһан тогтоо¬лоор Улаан-Баатар хотодо нүүрһэ хэрэглэлгэ хоригдоо. Тиимэһээ тус заводой үйлэдбэриин зүйл Монгол орон руу эльгээгдэхэ.
«Бүхы Буряад Уласаар модо отолһоной үлэгдэлнүүдые суглуулжа зөөхэбди. Ажалта һууринууд заводто болон үлэгдэлнүүдые суглуулха газарнуудта байгуулагдаха. Тэдэниие бутаргаха тусхай түхеэрэлгэ манда бии», - гэжэ У. Энхбилэг мэдээсэбэ.
Баргажан, Байгал шадарай, Загарай ба Хори аймагуудта ой модо отолдог газарнуудта үлэгдэл ехэ байдаг, тэндэл суглуулха болон ашаха түбүүд олоор байгуулагдаха.
Буряадай Толгойлогшо Алексей Цыденовэй хэлэһээр, шэнэ завод олон бэрхэшээлнүүдые усадхаха аргатай.
«Монголой компани энэ үйлэдбэридэ 10 сая доллар шэглүүлхэ. Ой модо отолһоной үлэгдэлнүүдые усадхаха болон ажаһуугшадые ажалаар хангаха асуудалнуудые манда шиидхэгдэхэнь бэрхэшээлтэй. Байгал шадарай аймагай Таловкын түмэр, бетон зүйлнүүдэй завод хүдэлхэеэ болинхой, хүдэлмэришэдынь ажалгүй болошоо. Тиигэжэ тэндэ 50 хүнэй ажалта һуури бии болохо юм», - гэжэ Алексей Цыденов мэдээсэбэ.
Бага олзын хэрэг эрхи¬лэгшэд иимэ түсэлнүүдые эдэбхитэйгээр бэелүүлхэ аргатай. Хэдыхэн жэлэй саана Зүүн Сибириин технологическа ехэ һургуулиин эрдэмтэд иимэ завод байгуулха тухай хэды дахин һанамжаяа мэдүүлээ бэлэй. Харин мүнөө Монголой үмсын хэрэг эрхилэгшэд энэ хэрэг бэелүүлхэнь хаш.
Пеллет-түлишэ хадаа модо тайраһанай бүхы үлэгдэлнүүдые бутаруулжа дараһан гранула мэтэ зүйл гээшэ. Энэ завод оршон тойронхи ой тайгые сэбэрлэлгэдэ тон һайн нүлөөтэй бшуу. Байгша оной мартын 18-да Буряад Уласай Толгойлогшо Алексей Цыденов уласай хэмжээнэй хуули баталаа бэлэй. Тэрэнэй ёһоор, модо бэлдэдэг эмхинүүд ба олзын хэрэг эрхилэгшэд модо отолһон ойн талмай дээрэһээ бүхы үлэгдэлнүүдээ суглуулан, сэбэрлэхэ уялгатай болонхой.
