Тиин Илалтын баярай ойдо зорюулагдаһан тусхай эмхидхэлгын комитет байгуулагдажа, февралиин 19-дэ тэндэ суглаан үнгэрбэ.
Мүн тиихэдэ Буряад Уласта ойн баяртай холбоотой 132 хэмжээ ябуулганууд түсэблэгдэнхэй. Тэрэнэй хажуугаар дурасхалнуудай заһабарилга, ветерануудта туһалха ажал ябуулагдаха юм.
Илалтын парадта хадаа майн 9-дэ түрүүн жэлнүүдһээ бүри олон сэрэгшэд хабаадалсаха. Мүн тиихэдэ, Монгол оронһоо сэрэгшэд хабаадалсаха.
- Тэдэнэр хадаа бүхы ниигэмэй талануудта анхаралаа хандуулна, онсо илгаатань хадаа һайн дуралта зонуудай штаб болоно. Волонтернууд үнгэрһэн жэлэй декабрь һарада ветерануудта туһалха зорилго абаһан юм. Залуушуул тэдэ зондо гэрэй ажалда туһалсана. Һайндэрэй хэмжээ ябуулганууд дүрбэн таһагаар хубаагдана: соел-уралигай, тамирай, болобосоролой, дураасхалта ажалай -, гэжэ Буряад Уласай Засагай газарай Түрүүлэгшын орлогшо, Элүүрые хамгаалгын сайд Евгения Лудупова хөөрэжэ үгэбэ.
Алексей Цыденов ветерануудтай ажалхада хэрэгээ удаан татажа, хэмжээ ябуулгануудаа саашалуулжа болохогүй гэжэ тэмдэглэбэ. Мүнөө хадаа Буряад Уласта 20 ветеран ажаһууна, блокадна Ленинградта ажаһууһан 5 хүн, «наһандаа хүрөөгүй фашизмын хаалтада һуугша» гэһэн нэрэтэй 12 хүн, 1485 хүн фронтын ажалшад болоно юм.
- Бидэ хадаа Илалтын 80 жэлэй ойн баярын дурасхаалта медальнуудые барюулжа эхилээбди. Тэрэмнай апрелиин 1 болотор дүүрэхэ еһотой. Хурдан саг соо медальнууд ба бэлэгүүд зорюулагдаһан зондоо хүрэхэ еһотой гэжэ һануулнаб. Дайнда хабаадаһан зомнай хадаа 20 лэ хүн үлөөд байна. Эдэ зонтой онсо хандалгатайгаар, һайнаар ажалаа ябуулхыентнай гуйнаб. Һайндэрнүүдэй хэмжээ ябуулгада харин урижа шадахагүйбди, тэдэ зон 99, 100 үндэр наһа хүрэһэн. Тиимэһээ гэртэнь ошожо амаршалха хэрэгтэй юм - гэжэ Буряадай толгойлогшо хэлэбэ.
Соел уралигай талаар хадаа элдэбын акцинууд, зүжэгүүд, тоглолтонууд, үзэсхэлэнгүүд, парад, үдын дундахи буудаха заншал гэхэ мэтэ хэмжээ ябуулганууд болохо. Зарим хэмжээ ябуулганууд январь һараһаа эхилһэн байна. Жэшээлхэдэ, «Агуу Илалта» (0+ наһанай хизаарлатай) гэжэ арадай бүтээлнүүдэй мүрысөөн ябана. Ехэнхи хэмжээ ябуулгануудань аймаг нютагуудаар, хотонуудай тойрогуудаар 2025 оной май-июнь һаранууд соо үнгэрхэ. Аймаг бүхэндэ тоглолтонууд болохо. Тэндэ хоорой, дуу бүжигэй, фольклорна, театральна бүлгэмүүд, мүн хүүгэдэй уралигай һургуулинууд, мэргэжэлтэ артистнар, эстрадын мүшэд дуулаха, тайзан дээрэ гараха.
Мүн тиихэдэ тусхай сэрэгэй операцида зорюулагдаһан хэмжээ ябуулганууд үнгэргэгдэхэ. Тэндэ хадаа иимэ сэдэбүүдээр үзэсхэлэнгүүд неэгдэхэ: түүхэтэ бэшэг баримтануудаар ба фотозурагуудаар ба уран гартанай ажалнуудые харалга. Илаһан зондо бэлэгүүд, мүнгэн шагналнууд барюулагдаха.
Тиихэдэ, «Агуу Илалта» (0+) гэһэн хэмжээ ябуулгын туршада үшөө хадаа уран һайханай мүрысөөнүүд үнгэрхэ юм. Гала-тоглолто мүн лауреадуудай шагналтанууда хадаа июниин 27-до соелой ба тамирай «Наадан-Сурхарбаан» (6+) эмхидэ үнгэрхэ гэжэ Буряадай соелой яаманай сайд Соелма Дагаева хөөрэбэ.
Илалтын Ойн баярай жэлдэ Буряад Уласта 31 тамирай хэмжээ ябуулганууд түсэблэгдэнхэй. Болобосоролой байгуулганууд соо «Илалтын сонхонууд», «Илалтын дуун», «Сэрэгэй дуунай фестиваль», «Дурасхаалай вахта» гэхэ мэтэ олон хэмжээ ябуулганууд эмхигдэхэ. Буряадай һургуулинууд соо хонхын орондо Эхэ Ороноо хамгаалһан зоной баатаршалга гаргаһан тухай илалтын дуунууд дугарха юм.
