Уржадэр Улаан-Үдэ хотын Зүблэлнүүдэй талмай дээрэ ТОСуудай анха түрүүшын найр наадан болобо. Энэ нааданда оролсоһон ТОСуудай түлөөлэгшэд нэгэн дуу һаналаар ТОСуудые гүрэнэй талаһаа дэмжэхэ тухай Буряад Уласай хуули һайшааба
2017 оной май һарада Алексей Цыденовэй орон нютагуудтай танилсажа байхадань, нютаг дэбисхэрэй ниитын өөһэдын хүтэлбэринүүдые (ТОС) гүрэнэй талаһаа тэдхэхэ тухай һанамжа арад зон оруулһан байгаа. Тиигэжэ ТОСуудые тэдхэхэ тухай хуулиин түлэб мүнөө бэлдэгдэжэ, Буряад Уласай Засагай газарай гүрэнэй хуули зүйн (правовой) хороондо, Буряад Уласай Арадай Хуралда оруулагдаһан байна.
– Тус Хуули ТОСуудые хамгаалхын тула юм, жэл бүхэндэ мүнгэн сангай дэмжэлгэ байха гэһэн лаб найдуулгань болохо. Тус хуулиин ёһоор мүнгэнэй, хуули зүйн болон мэдээсэлэй дэмжэлгэ хараалагдаха юм. Гүрэнэй дэмжэлгээр, ТОСууд түрүү ээлжээндэ байһан ажалаа өөһэдөө тодорхойлжо хэхэ болохот, – гэжэ толгойлогшын уялга дүүргэгшэ Алексей Цыденов мэдүүлээ.
ТОСуудай энэ болоһон найр нааданда уласай эрхим ТОСууд ниислэлэйнгээ түб талмай дээрэ һэеы гэрнүүдээ, хасагуудай байшан гэр, эвенкын урса гэр баряа, майхануудые татаа. Тэрэ зохёоһон байрадаа өөһэдыгөө танюулха зорилгоор, зондо ажалаа хөөрэжэ үгөө, үзэсхэлэн, яармаг дэлгээгээ юм.
