Энэ уулзалгын үедэ Москва хотодо Энэдхэгэй түлөөлгын газарта Буряад Уласта мүнгэ һомололгын холын хараата түсэбүүд тухай хөөрэхэ, харуулха гэжэ Алексей Цыденов Гандадхаран Баласубраманиан хоёр хэлсэбэд. Тиихэдэ болбосорол, соёл, эдэй засаг болон технологиин һалбаринуудта аша үрэтэйгөөр суг ажалаа ябуулха тухай Энэдхэгэй түлөөлэгшэ хэлэбэ.

- Суг ажал ябуулха талаар һонирхолтой, бэелүүлэгдэмээр дурадхалнуудые оруулһандатнай баяртай байнаб, - гэжэ Алексей Цыденов тэмдэглэбэ.

Буряад Уласай Толгойлогшын уялгануудые дүүргэгшын хэлэһэнэй ёһоор, буддын шажанай дээдэ һургуулиин, соёл түүхын болон байгаалиин шэнжэнүүдые үзэхэ һалбаринуудта һурадаг оюутад дүй дүршэлөөрөө андалдаха, Энэдхэг болон Ород гүрэнүүдэй ажабайдалтай танилсаха тухай оруулһан дурадхал һонирхол түрүүлнэ. Тиихэдэ Буряад Уласай зохёохы бүлэгүүд Энэдхэгтэ, Энэдхэгэй зохёохы бүлэгүүд Буряад Уласта гастрольдо гаража, соёлой һалбарида нягта харилсахаар. Фармацевтика болон хүнгэн үйлэдбэриин һалбаринуудта суг ажал ябуулхаар.

- Буддын шажан, соёлой һалбарида нягта харилсахаһаа гадуур, бусадшье талаар түһөөтэйбди. Тиимэһээ эдэй засагай һалбарида аша үрэтэйгөөр ажалаа ябуулхын тула, һайн танилсаха болонобди. Москва хотодо Энэдхэгэй түлөөлгын газарта Буряад Улас тухайгаа хөөрэхэ, харуулхыетнай дурадханаб. Энэ хэмжээ ябуулгада Ородой ниислэлдэ ажалаа ябуулдаг Энэдхэгэй олзын хэрэг эрхилэгшэдые урихабди. Тэдэнэр танай онсо шухаг баялиг, арга боломжонуудтай танилсаха, - гэжэ Ородой Холбоото Уласта Энэдхэгэй бүрин эрхэтэ түлөөлэгшын зэргэтэй сайд Гандадхаран Баласубраманиан хэлэбэ.

Улаан-Үдын авиационно заводой вертолёдууд Энэдхэгтэ һонирхол татадаг зандаа. Тиимэһээ мүнөө тэдэнэр бэлэн вертолёдуудые абахаһаа гадуур, шэнжэлхы талаар суг ажал ябуулжа, саашадаа сугтаа үйлэдбэри хүгжөөхэ талаар саг ерээ гэжэ Гандадхаран Баласубраманиан тэмдэглэбэ.

- Олон һонирхолтой дурадхалнууд оробо. Энэ талаар тусхай ажалай бүлэг байгуулжа, саашадаа суг ажал ябуулха талаар бүхы арга боломжонууд хараалагдаха, - гэжэ Алексей Цыденов хэлэбэ.

Санкт-Петербургдэ үнгэргэгдэһэн эдэй засагай уласхоорондын 21-дэхи хуралдаанай үедэ Буряад Улас Энэдхэг оронтой нягта харилсаха аргатай болоо. Хуралдаанай үедэ Буряад Уласай Толгойлогшын уялгануудые дүүргэгшэ Алексей Цыденов Ородой Холбоото Уласта Энэдхэгэй бүрин эрхэтэ түлөөлэгшэ Панкадж Сарантай уулзаһан байна. Тиимэһээ Энэдхэгэй түлөөлэгшэд Буряад Улас ерэжэ, хоёр гүрэнүүдэй хоорондохи харилсаа бэхижүүлэгдэбэ.

Буряад Уласай Засагай газарай мэдээсэлэй албанһаа гэрэл зураг абтаба.