Буряад Уласай Толгойлогшо Алексей Цыденов шууд дамжуулгын үедэ Улаан-Үдэдэхи гурбадахи гүүр бариха түсэбүүдэй тухай асуудалда харюусаба.
Ноябриин 17-до барилгын ажалые дүүргээгүй «Хотьковский автомост» гэһэн компанитай байгуулһан гэрээ болюулха талаар шүүхэ хурал болохо.
— Гэрээ болюулһанай удаа гүйсэдхэгдэһэн болон гүйсэдхэгдээгүй ажалнуудай үнэлгээ хэгдэжэ, шэнэ тоосоо гаргагдаха. Һүүлээрнь шэнэ конкурс зарлагдажа, шэнэ гэрээ байгуулагдаха. Мүнөө болотор бидэ 2027 оной болзорто багтажа байнабди, — гэжэ Алексей Цыденов баталба.
Мүнөө сагта гол объект — өөрөө гүүр баригдаһан, тэрээн руу орохо замууд эмхидхэгдэһэн байна. Томо ажалнуудай тоодо төмөр замай нэгэ хубиин доогуур гарам хэхэ, мүн дүүргэлтын инфраструктурын ажалнуудые гүйсэдхэхэ үлэһэн байна.
Уласай толгойлогшын хэлэһээр, үлэһэн ажалнуудта мүнгэн һангалта хангалтатай. Росавтодороор гурбадахи гүүр дүүргэхэ бюджет шэнжэлэгдэн баталагдаһан тэрэ Буряад Уласта хадгалагдажа үлэхэ.
Уда мүрэн дээгүүр гурбадахи гүүр барилга 2020 оной хабар эхилһэн байна. Анхандаа барилгын ажал 2024 ондо дүүргэгдэхэ ёһотой гэжэ мэдүүлэгдэһэн аад, һүүлдэнь болзорнууд урагшалуулһан. Объектын ниитэ үнэ сэн — 7,5 миллиард түхэриг.
Октябрь һарада барилгын бэлэн байдал 49 хуби боложо байба.
