Декабриин эхиндэ Улаан-Үдэ ажалай айлшалалтайгаар Оросой Холбоото Уласай Засагай газарай түрүүлэгшын орлогшо, Оросой Холбоото Уласай Юрэнхылэгшын Алас Дурнын федеральна тойрогтохи бүрин эрхэтэ түлөөлэгшэ Юрий Трутнев ерэһэн юм.
Айлшалалайнгаа үедэ тэрэ «Сэрэгшэ» түбэй һалбарида орожо үзэбэ. Буряад Уласай Засагай газарай олондо мэдээсэл тарааха албанай мэдээсэлээр, Юрий Трутнев һуралсалай танхимуудые хаража, заабари заагшадтай хөөрэлдэбэ.
Энэ хадаа тэрэнэй тус һалбаридахи гурбадахи айлшалал. Анха түрүүшынхинь 2023 оной август һарада боложо, тэрэ үедэ Юрий Трутнев техникэ хэрэгсэлнүүдэй хангалта, курсантнуудай бэлэдхэлэй талаар һанамжаяа үгэһэн байна. 2024 оной февралиин һарада сэрэгэй полигон дээрэ БПЛА ба тактическа эмшэлгээр модульна һуралсалай танхимуудтай, FPV-дрон ударидаха һуралсалай трассатай танилсаа.
«Сэрэгшэ» түбэй байлдаанай бэлэдхэлэй талаар захиралай түрүүшын орлогшо Дмитрий Кириенкогой мэдээсэһээр, 2023 ондо һалбари байгуулагдаһанһаа хойшо 10 мянгаһаа дээшээ курсантнууд бэлдэгдэһэн байна.
Инструктор Амгалан Дондоковой бэлдэһэн «Нукеры», «Монолит», «Беркут» гэһэн курсантнуудай бүлгэмүүд Буряадые түлөөлжэ, лазерна байлдаанай тэмсээнүүдтэ, «Зарница 2.0» гэһэн сэрэгэй наадануудта түрүү һууринуудые эзэлһэн байна. 2025 оной майн 9-дэ «Сэрэгшэ» түбэй курсантнуудай колонно Агууехэ Илалтын һайндэрэй хүндэлэлдэ зорюулагдаһан хотын парадта анха түрүүшынхиеэ алхан гараба.
Һалбариин ажалшад ба курсантнууд олон уласхоорондын үйлэ хэрэгүүдтэ хабаадалсаһан байна.
2023 онһоо эхилжэ, зундаа «Сэрэгшэ» түб Улаан-Үдэдэхи «Галхан» лагерьта «Геройнуудай саг» гэһэн сэрэгэй-спортын, эхэ орондоо дуратай байха һэлгэлтэнүүдые эмхидхэнэ. Жэл бүри гурбан һэлгэлтэдэ Буряад ороной бүхы булан тойрогуудһаа 300-гаад үхибүүд хабаадана.
2025 ондо «Сэрэгшэ» түб һуралсалай программадаа шэнэ шэглэл — снайперска бэлэдхэл оруулба. Оросой байлдаанай снайпингын федерацитай хамта бүридхэгдэһэн энэ курсые зундаа болодог «Залуу геройнуудой саг» гэһэн мэргэжэлтэ һэлгэлтэнүүдтэ ороной бүхы нютаг можонуудһаа ерэһэн үхибүүд шудална.
— Хамагай шухала юумэн — һалбари үхибүүдтэ һонирхол татаха, тэдээндэ хэрэгтэй байха, инструкторнууд курсантнуудтай һайн харилсаатай байха ёһотой. Би айлшалһан үедэ үхибүүдтэ таалагдана, тэдэ һурахадаа дуратай байна гэжэ мэдэрбэб. Тэдэ Эхэ оронoo хамгаалхада һурана, шэнэ мэдэсэ абана. Тиимэһээ «Сэрэгшэ» түб өөрынгөө зорилгые дүүргэжэ байна, — гэжэ Юрий Трутнев тэмдэглэбэ.
Буряад Уласай Толгойлогшо Алексей Цыденов «Сэрэгшэ» түбтэхи һуралсал — ганса шадабари бэшэ, харин зан абари, хүмүүжэл, Эхэ орондоо үнэн сэхэ байдалтай байха тухай гэжэ онсолобо.
— Юрий Петрович курсантнуудтай уулзажа, заабаринуудые үгэжэ, мэдээлэлэй технологиин һалбарида мэргэжэл шэлэхые зүбшөөһэн байна, юундэб гэхэдэ манай орон өөрынгөө үндэр технологинуудые заабол хүгжөөхэ, — гэжэ уласай толгойлогшо хэлэбэ.
«Воин» түб Оросой Юрэнхылэгшын даабаряар 2022 оной декабриин 1-дэ байгуулагдаһан. Мүнөө үедэ тус түбэй һалбаринууд Оросой 21 нютаг можодо хүдэлнэ.
