Декабриин 7-до үнгэрһэн пресс-конференци дээрэ энэ арганууд тухай Буряадай толгойлогшо Алексей Цыденов хѳѳрэжэ үгэбэ.
- СВО-до хабаадагшадые, гэр бүлэнүүдыень дэмжэхэ, харалсаха арганууд манда үнэхѳѳр олон юм. Һүүлшын нэгэн хадаа – оро һураггүй үгы болоһон али олзологдолгодо ороһон зон байгаа һаань, тэдэ зондо сэрэгэй тэтхэмжэ үгы болоно. Гансал салингань ябана юм. Харин гэр бүлэнь эндэ үлэһэн байна. Тиихэдэ бидэ гэрэй түлбэринүүдыень бэе дээрээ абанабди – уһанай, галай, сахилгаанай, түлеэнэй гэхэ мэтэ. Тэрэмнай хадаа оро һураггүй үгы болоһон али олзологдолгодо ороһон зоной гэр бүлэнүүдтэ ямаршье илгарал үгы. Үхибүүдэнь һургуулидаа түлбэригүй эдеэ хоол барина, нэгэдэхи гү али арбан нэгэдэхи гү, хамаа үгы тэрэнь. Түлбэригүй автобусаар ябана, һургуулиин һүлээр бусад хэшээлнүүдтэ ябана, музей, театр ошоно. Бидэндэ дүшэ гаран дэмжэлгын арганууд, тэдэнээ алдангүй ябанабди, - гэжэ Алексей Цыденов хубаалсаба.
Буряадай толгойлогшо СВО-гой эхилһээр уласһаа 7 миллиард түхэриг сэрэгшэдтэ гаргагданхай гэжэ тэмдэглэбэ. Тэрэ мүнгѳѳр мобилизованна, һайн дураар ошоһон, контракт баримталга табиһан зондо туһаламжа хүртэгдээ. Мүн тиихэдэ, элдэб хэрэгсэлнүүд сэрэгэй албануудта абагдажа үгтэһэн гэжэ уласай захиргаанай пресс-танхим мэдүүлнэ.
- СВО эхилһээр 350 мянга гаран элдэб үнгын хэрэгсэл бидэ ябуулаабди, 600 гаран унаа машина, 1700 гаран тепловизорнуудые, баһал тиимэ олон рацинуудые ябуулаабди. Ехэ олон юумэн даа,- гэжэ Алексей Цыденов хѳѳрѳѳ.
