Буряад уласта эмшэлэлгын-элүүржүүлгын аяншалгын кластер байгуулха түсэлтэй Алексей Цыденов танилсуулха юм.
Дэлхэйн аяншалгын һалбариин томо хэмжээ ябуулга Санкт-Петербург хотодо үнгэргэгдэхэ. 158 гүрэнэй 1500-һаа дээшэ түлөөлэгшэд хэмжээ ябуулгада хабаадажа, аяншалгын һалбариин шухала асуудалнуудаар зүбшэн хэлсэхэ юм.
Ородой Холбоото Уласай аяншалгын талаар федеральна агентство сесси эмхидхэнэ гээд тэмдэглэлтэй. Сессин программада 16 хэмжээ ябуулга Экспофорум, Таврическа ордон болон Юрэнхылэгшын номой санда – эдэ гурбан талмайда үнгэргэгдэхэ.
Ородой Холбоото Уласай можо нютагуудай хүтэлбэрилэгшэдэй албан хэрэгэй уулзалгада Алексей Цыденов хабаадаха. Уулзалгын үедэ аяншалгын һалбари, эдэй засагай һалбарида тэрэнэй оруулдаг хубита, газар дэбисхэрнүүдэй хүгжэлтэ, мүнгэ һомололгын арга болон эрхим практика, мүнгэ хүрэнгэ оруулагшадые һонирхуулга, аяншалгын һалбариин хүгжэлтын холон хараата түсэбүүд болон харгын карта гэһэн асуудалнууд хэлсэгдэхэ юм.
Тиихэдэ уласай хүтэлбэрилэгшэ эмшэлэгын болон элүүрүүлгын аяншалга хүгжөөхэ талаар дискуссида хабаадаха. Алексей Цыденов Ород гүрэнэй зүүн зүгтэ эмшэлэлгын-элүүржүүлгын аяншалгын кластер байгуулха түсэлтэй танилсуулха гээд дуулганабди.
Һүүлэй арбан жэлдэ уласаар аяншалһан хари гүрэнэй ажаһуугшадай тоо 4,5 дахин дээшэлээ, 2017 онһоо аяншалгашад 21,1 хубяар олон болоһон байна. Тиихэдэ Буряад уласаар экскурсида ерэһэн хүнүүдтэй хамта, аяншалагшадай тоо 1 106 382 хүн болоно, тэрэнэй 76 673-иинь хари гүрэнүүдэй түлөөлэгшэд. 2-35 он болотор улас доторой болон улас ерэжэ аяншалгын хүгжэлтын уласай стратеги байгша оной һүүл багта абтахаар хараалагдана.
