Үдын урда
Ород болон буряад хэлэнүүд дээрэ бэшэгшэд тус тустаа таһаржа, багахан дүхэригүүдэй оршондо уран зохёол дархалха оньһон аргануудаараа хубаалдаа. Прозын түхэлөөр бэшэгшэд шүлэг найруулагшадһаа үсөөн гээд харагдаба. Буряад хэлэн дээрэ туужануудые Ардан Ангархаев, Александр Лыгденов, Доржо Сультимов сэгнээ. Тиихэдэ эхилэн бэшэгшэдэй уянгата мүрнүүдтэ Чингис Гуруев, Лариса Халхарова, Дулгар Доржиева, Даши-Дондоб Очиров, Амгалан Будаев гэгшэд шүүмжэлэл үгөө. Богонихон аад, гүн удхатай шүлэгүүдые эхилэн бэшэгшэд найруулна гээд, жюриин гэшүүд тэмдэглээ. Тиихэдээ зүүн зүгэй, илангаяа япон арадай «хокку», «танка» гэһэн шэглэл дууряана.
Ородоор шүлэг бэшэгшэдэй найруулгануудые Николай Хосомоев, Татьяна Григорьева, Светлана Нестерова гэгшэд хараа. Ородоор прозо бэшэгшэдые Светлана Имехелова, Анна Виноградова, Владимир Гармаев гэгшэд шалгаа. Тиихэдээ олонхи авторнууд шэдитэ фантастикын шэглэлээр бэшэхэ дуратай байна гээд элирбэ. Шуһан, дайн, сансарын орон гэхэ мэтые дайрабашье, гэрэлтэ ерээдүй зохёолнуудтань байна.
Үдын хойно
Алибаа олон шалтагаанһаа боложо, удаан сагта зарлагдаагүй байһанаа эхилэн бэшэгшэдэй хуралдаан мүнөө эрхилэгдэбэ, уран зохёол бэшэгшэдэй, уншагшадай ёһотой һайндэр боложо байна гээд, Буряадай мэдээжэ уран зохёолшо, эрдэмтэн Ардан Ангархаев хуралдаа нээхэ үедөө тэмдэглээ. Энэ хэмжээ Буряадай Уран зохёолшодой холбооной эдэбхи үүсхэлээр Буряад Республикын Правительство болон Арадай Хурал эрхилээ гээд хэлэгдэбэ. Тиигэжэ Буряадай соёлой министрэй орлогшо Николай Емонаков үгэ абаба. Тэрэнэй хэлэһээр, республикада Уран зохёолой жэл соносхогдонхой, эгээл тиимэһээ энэ хуралдаан зарлагдаа. Буряадай Уран зохёолшодой холбооной түрүүлэгшэ Матвей Чойбонов залуу зохёолшодто үреэлэй һайхан үгэнүүдые хэлэбэ. Ород хэлэн дээрэ хэблэгдэдэг «Байкал» сэтгүүлэй редактор Булат Аюшеев эхилэн бэшэгшэдэй найруулгануудтай танилсуулба.
Ородоор шүлэг бэшэгшэдэй дундаһаа Евгений Мудров, Бальжид Сандакдоржиева, Алексей Шаманский гэгшэд шалгарба. Ородоор прозо бэшэгшэдэй дүхэригтэ Евгения Эрдынеева, Екатерина Болонева, Владимир Вишняков гэгшэд илажа гараба.
Буряадаар шүлэг бэшэгшэдэй дундаһаа Арюна Бадмажапова, Элбэг Зандраев, Буян-Дэлгэр Цыренжапова, Соелма Тарнуева, Пунсэгма Мандарханова, Александра Цыденова гэгшэд шалгараа. Буряадаар прозо бэшэгшэдэй дундаһаа Ханда Дарижапова, Эржэн Шагдарова, Нимбу Жамбалов гэгшэд түрүүлээ.
«Уран зохёолшодой ажал захагүй үргэн, эхилбэл, эсэс байхагүй. Тиибэшье та олоороо эхилээ хадаа һайнаар захадань хүрөөрэйт»,- гээд, хуралдаанай түгэсхэлдэ Ардан Ангархаев үреэбэ, дуулгаха «Буряад Унэн».
