Россиин Холбооной Уласай Юрэнхылэгшын Сибирьтэхи Бүрин эрхэтэ түлөөлэгшэ Н. Рогожкин Улаан-Үдэдэ Байгал шадархи нютаг можонуудай ажабайдал хүгжөөхэ талаар зүблөө үнгэргэхэнь

Ородой Холбооной Уласай Юрэнхылэгшын Сибириин федеральна тойрогтохи бүрин эрхэтэ түлөөлэгшэ Николай Рогожкин Улаан-Үдэдэ Байгал шадархи нютаг можонуудай ажабайдал зохёон хүгжөөхэ талаар Залан хүтэлбэриин зүблэлэй суглаа зарлаба.

Гадна, Буряад Уласай толгойлогшо Вячеслав Наговицынтэй уулзажа, Буряад ороной ажабайдал һайжаруулха талаар дурадхалнуудыень тэрэ шагнаха хүсэлтэй. Николай Рогожкин акционернэ «Улаан-Үдын авиазавод» бүлгэмэй саашанхи хараа түсэбүүдтэй танилсаха, мүн Бэеын тамирай үргөө хүрэжэ хараха.

Залан хүтэлбэриин зүблэлэй суглаанда Сибириин можо нютагуудай хүтэлбэрилэгшэд – Эрхүүгэй можын губернатор Сергей Ерошенко, Забайкалиин хизаарай губернатор Константин Ильковский, можонууд хоорондын «Сибириин хэлсээн» эблэлэй гүйсэдхэхы хорооной түрүүлэгшэ Владимир Иванков, Россиин эрдэмэй академиин юрэнхылэгшын орлогшо, Сибириин тайһагайнь түрүүлэгшэ Александр Асеев гэгшэд хабаадалсана. Россиин үйлэдбрилгын, хүдөө ажахын, элшэ хүсэнэй болон бусад яамануудай түлөөлэгшэд, тэрэшэлэн Сибириин тамуужанай, Россиин түмэр замай, олон тоото банкнуудай, олзын хэрэг эрхилэлгын эмхинүүдэй бусадшье албан зургаануудай хүтэлбэрилхы тушаалтад хуралдаанда байлсана. 

Инвестицинүүдые татаха, хүн зоной ажаһуудал хангалгын эмхинүүдэй байра байшангуудые бариха арга боломжонууд, тэрээн зуур Буряадай Уласай, федеральнашье хэмжээнэй засаг зургаануудай түсэбүүд тухай хөөрэлдөөн болохоор хараалагданхай. Залан хүтэлбэриин тус зүблэлэй «Байгал» гэһэн фракцинууд хоорондын ажалай бүлэгтэй холбоо харилсаа хайшан гэжэ зохёохоб гэжэ шухала асуудал эндэ мүн лэ хэлсэгдэхэ. Фракцинууд хоорондын бүлэгэй зүгһөө Гүрэнэй Дүүмын депутат Михаил Слипенчук үгэ бариха байна.