2019 оной октябрь һарада Буряад уласта боксоор дэлхэйн чемпионат үнгэргэгдэхэ, тэрэ болотор платформанууд заһагдаха гэжэ түсэблэгдэнэ.
Түмэр харгын вокзалай һэльбэн шэнэдхэлгын түсэлдэ 800 саяһаа дээшэ түхэриг һомологдохо. Тиихэдэ бүхы ажалнууд 2019 оной декабрь һарада дүүрэхэ гэжэ түсэблэгдэнхэй.
- Шэнэ вокзалтай, вокзалай шадархи талмайтай боложо, һайн шанартай туһаламжа хүргэгдэхэ. Ажаһуугшадай самолёдоор ниидээшье һаа, автоунаануудаар ябаашье һаань, түмэр харгы эрилтэтэй байһаар. Болбосон түхэлтэй оршондо ажаһуугшадай харгыда ябаха талаар горитой ажал ябуулнабди. «РЖД» бүлгэмдэ баяр хүргэжэ, ажалдань амжалта хүсэнэбди, - гэжэ Буряад Уласай Толгойлогшо Алексей Цыденов хэлэбэ.
Мүнөө түмэр замай вокзалда үдэр һүнигүй ажал хэгдэнэ. Биледүүдые худалдаха залда һэльбэн шэнэдхэлгын ажал дүүрэнхэй. Хүлеэлгын танхим Буряад уласай арадай уран зураашан Юрий Мандагановай бүтээлнүүд шэмэглэнэ.
Зүүн Сибириин түмэр замай ахалагша инженер Николай Рыковэй хэлэһээр, вокзалай уһанай, дулаанай хангалгын байгууламжа һэльбэн шэнэлэгдээ. Тиихэдэ эрэмдэг бэетэй зоной һаадгүй оршондо ябаха талаар тусхай хэрэгсэлнүүд тохогдохо. Мүнөө эндэ хүүгэдэй танхим ажалаа эхилэнхэй. Вокзалай талмайда хараа муутай зондо тусхай плитка дэлгэгдэхэ юм.
