Буряад Уласта түрүүшын үхибүү түрэхэ дундахи наһан хорин юһэн наһан гэжэ мэдүүлэгдэбэ. Энэ хадаа мэргэжэлтэдэй һанамжаар дурадхагдаһан наһанһаа үндэр болоно. Юунһээ дулдыданаб гэхэдэ, энэ хадаа ажал хүдэлмэри, болбосорол, мүнгэ салингай асуудал гэхэ мэтэ бэрхэшээлнүүд. Харин эмшэнэр һануулна - элүүр мэндын таланууд тухай мартаха хэрэггүй.
Эмшэнэр хадаа эхэнэр хүнэй түрүүшэнхиеэ түрэхэ тухай нэн түрүүн залуу байхада ехэ һайн гэжэ тэмдэглэдэг.
Юундэ харин 25 наһа хүрөөгүй байхада түрүүшэнхиеэ хээлитэй болоходо һайн бэ?
Энэ асуудалда Улаан-Үдэ хотын перинатальна түбэй ахамад эмшын акушерска талаар орлогшо Екатерина Дегтярёва иигэжэ харюу үгэнэ: «Залуу эхэнэрэй бэе хадаа жэрмэһэнэй, түрэһэнэй һүлээр, түргөөр һайн болоно.
Эхэнэр залуу байхада хурдан жэрмэһэн боложо шадана, юһэн һара соо һайнаар үхибүүгээ абажа ябаха, тиихэдэ залуу эхэнэрэй элүүр мэндэ, бэень һайн байха, үбшэндэ даагдахагүй, ехэнхэ хроническа үбшэнгүүд үшөө бии болоогүй байна. Тиихэдэ, залуу байхада бэешье, ухаан бодолшье хурдан һайн болоно гэхэдэ ехэ шухала юм».
Өөрынгөө һанамжаяа Арюна Очирова мэдүүлбэ. Тэрэнэй ажамидаралда эжы болохо хуби ехэ шухала байгаа.
- Би түрүүшэнхиеэ 20 наһатайда эжы боложо шадааб. Тиихэдэ залуу байхадаа зарим юумые ойлгодоггүй байгааб, бүхы харюусалгыень, үхибүү хүмүүжүүлхэ бэрхэшээлые баһа. Харин шэнэ маягта дадахада тиимэшье хүндэ байгаагүй. Эндэ намайе ехээр минии гэр бүлэ, түрэлхидни, манай улас ехэ дэмжээ. Би мүнөө хадаа хоёр үхибүүдэй эжы болоноб, теэд гурбадахияа эжы болохоео бэлдэжэ байнаб. Залуу ябахадаа эжы болоһондоо ехэ баяртай байдагаб. Минии ажамидарал мүнөө бүтэн аза жаргалтай, гэр бүлэтэй, үхибүүдтэй хүн байнаб, - гэжэ Буряад Уласай ажаһуугша эхэнэр хөөрэбэ.
Харин залуугаар эжы болохо шиидэбэри ганса элүүр мэндын шалтагаануудһаа бэшэ харин залуу наһанһаа болоно. Эжы болоод, үхибүтэеэ сугтаа хүгжэжэшье, ажаһуужа байхадашье болохо юм.
