Мүнөө Буряад Уласта олон эхэнэрнүүд үхибүүтэй болохо хэрэгээ орой наһан болотор хойшолуулангүй байхаяа оролдоно. Теэд үхибүүдтэйгээ сугтаа, 25 наһа хүрэнгүй түрэжэ ябахадаа, болобосоролтой боложо, ажал хэнэ, хубиин аза жаргалаа олоно.
Залуу эжы мүн Залуушуулай түбэй мэргэжэлтэн Баяна Лыксокова эртэ үхибүүтэй болоходо ехэл һайн гэжэ һанана.
«Оюутан ябахадаа эжы болохо шиидэбэри ехэ зорилготой, хатуу зантай мүн бэедээ ехэ этигэлтэй хүнэй шиидэбэри болоно юм. Би хадаа 20 наһа һаял дабажа ябахадаа эжы болооб. Би дээдэ һургуулин оюутан ябааб, шалгалтануудтаа бэлдэжэ байгааб, ажалда орохо түсбүүдтэй ябааб. Гэнэтэ минии ажамидарал ондоо болоо юм. Мүнөө минии басаган 13 наһатай. Теэд, эрьелдээд харахада, эртэ эжы болоһомни намда бэрхэшээлшье, хуби заяанаймни бэлэгшье бооложо үгэбэ. Эртэ эжы болоходо харюусалгатай болоходомни, хайрлажа, дурлажа, бэеэ даажа ябахадамни туһалаа».
Теэд Баяна Лыксокова түрэлхидэй, гэр бүлын, гүрэнэй туһаламжа хэрэгтэй гэжэ ойлгуулна.
«Минии түрэлхидэймни туһаламжа ехэ шухала байгаа. Эжы абамни, ахымни гэр бүлэ, түрэлхид, нүхэдни намда басагатаймни ехэ туһалаа, ходо намайгаа дэмжэжэ, этигэжэ байгаа. Тиихэдэ гүрэнэй туһаламжа баһа шухала байгаа. Би ниигэмэй талаар туһаламжын аргануудые хэрэглэһэн байнаб. Энэ хадаа үхибүүтэй болоходо нэгэ удаагай тэтхэмжэ, үхибүүгэй жэл хахад болотор түлэгдэхэ һара бүриин тэтхэмжэ, ниигэмэй талаар ипотека. Энэ арганууд залуу эжы абануудта ехэ туһаламжа үгэнэ юм».
Эртэ эжы болоходо болобосоролтой болоходо, ажалда гарахада, ажамидаралаа зохеоходо нэгэшье һаата болохогүй юм. Бүхы юумэн бидэнһээ, бидэнэй хүсээлнүүдһээ, мүрөөлэйнгээ хойноһоо ябаха шадаһаа дулдыдана.
