Үндэһэтэнэй музейн барилга 2021 ондо дүүргэхээр түсэблэгдэнэ. 13,8 мянган дүрбэлжэн метрэй талмайтай 4 дабхартай шэнэ байшан ая ганга сэсэгэй мяагаар барихаар түсэблэгдэнхэй. Сэсэгэй дэльбэ бүхэндэ түүхэ, соёл, байгаалиин һалбаринууд байгуулагдаха.
- Үндэһэтэнэй музей хадаа нэгэ талаһаа түүхэ, соёл, байгаалиин һалбаринуудай баялиг сахин хамгаалха, нүгөө талаһаа мүнөө үеын эрилтэнүүдтэй хамта хүгжэхэ болоно. Бүхы дэлхэйдэ һүүлэй арбаад жэлдэ музейнууд баригдана, олоной һонирхол татана. Үндэһэтэнэй музейн барилга хадаа Буряад Уласайн түүхын музейн байгуулагдаһаар 100 жэлэй ойн баярта уласай ажаһуугшад болон айлшадта үнинэй хүлеэгдэһэн, сэнтэй бэлэг болохо, - гэжэ Үндэһэтэнэй музейн захирал Татьяна Бороноева хэлэбэ.
Шэнэ байшанда М.Н. Хангаловай нэрэмжэтэ Буряадай түүхын музей, Ц.С. Сампиловай нэрэмжэтэ Уран һайханай музей болон Буряадай байгаалиин музей түбхинэхэ. Конференц-зал, хүүгэдэй музейн түб, мастерскойнууд, дурасхаалай бэлэгүүдэй магазин, кафе шэнэ музейдэ хүдэлхэ. Тиихэдэ эрэмдэг бэетэй зоной музейдэ орохо арга, унаануудые табиха газар хараалагданхай. Үндэһэтэнэй музейн барилгада 1,4 миллиард гарагашалгадаха.
Дээрэ нэрлэгдэһэн гурбан музейн жасанууд экспонадуудые хадагалха мүнөө үеын эрилтэнүүдтэ тааруу бэшэ. 2017 оной хабар Түүхын музей хаагдаһан байна гэжэ һануулнабди. Буряадай Түүхын музей хадаа Сибириин болон Алас Дурна зүгэй дэбисхэртэ экологиин шэглэлэй ганса музей юм.
