2014 оной ноябриин 27-до Буряад Уласай залуушуулай холбоон «Буряад хэлэн - минии омогорохол» гэһэн түсэлѳѳр һуралсалай хэдэн семинарнуудые үнгэргэбэ. Буряадай хүдѳѳ ажахын ехэ һургуулиин социологи политологиин танхимтай хамта энэ хэмжээ ябуулга хэгдээ. 90 гаран хүн эндэ хабаадуулагдаа. Тэдэнэй олонхинь хүдѳѳ ажахын ехэ һургуулиин оюутад болон залуушуулай ниитын эмхинүүдэй гэшүүд болоно.
«Буряад хэлэн - минии омогорохол» гэһэн сэдэбээр семинарые «Ресурс» гэһэн һуралсал бизнесэй түбэй захирал Дулма Содномова эмхидхэбэ. «Дара эхын магтаалаар буряад хэлэ үзэхэ арга нүлѳѳ» гэһэн сэдэбээр Бурхан багшын ехэ һургуулиин Радна лама багша оюутадтай уулзажа лекци уншаба. Сэтгүүлэгшэд Даша-Доржо Болотов, Баяр Жигмитов хоёр залуушуултай уулзажа, эхэ хэлээ мэдэхэ, үзэхэ тухай хѳѳрэлдѳѳ эмхидхээ юм.
Семинарта хабаадаһан залуушуулай һанамжа дурадхалаар иимэрхүү түхэлэй уулзалганууд ехэ һонирхолтой байна. Залуушуулые түрэлхи хэлээ, түүхэ соёлоо мэдэхэ болохо хэрэгтэ иимэрхүү аргаар танилсаха, мэдээжэ хүнүүдтэй уулзахада ехэ хэрэгтэй байна.
Ноябриин 28-да Буряад Уласай арадуудай найрамдалай байрада «Найдал» жасын грантда хүртэхэ һанаатай хүнүүдтэ проект зүб бэшэхэ бэелүүлхэ ухаанай семинар эмхидхэгдээ. Семинарта хабаадагшадта багша Эрдэни Дымчиков болон «Найдал» жасын ажалшад хэшээл үгѳѳ. Тиигэжэ проект зүб бэшэхэ бэелүүлхэ ухаанай оньһо, дүй дүршэл эндэ сугларһан хүнүүд ойлгожо абаа. Удаань «Open spaсe» тренинг үнгэргэгдѳѳ. Бултаараа хэлсэе гэһэн удхатай иимэ тренинг хадаа элдэб мэргэжэлтэй, һанал бодолтой, нэрэ түрэтэй хүнүүдые нэгэ газар суглуулжа, шэнэ бодол түрүүлхэ, тэрэ байһан һанаһан зүйлээ түсэл болгохо, тиигэжэ ажабайдалай орёо асуудалнуудые шиидхэхэ арга олохо гэһэн удхатай ажал юм. Эндэ сугларһан хүнүүд буряад хэлэнэй зарим хүндүүлхэй асуудалнуудые яахадажа зүб аргаар шиидхэхэб гэһэн асуудаалаар толгойгоо хүдэлгэбэ.
«Найдал» жаса мүнѳѳ дээрээ хадаа буряад хэлэнэй түсэлнүүдые шэлэжэ абаха урилдаа соносхоод байна. Хүнүүд ямар нэгэ проект бэлдэжэ, энэ урилдаанда оролсохо аргатай. Мүнѳѳ дээрээ 20 мэдүүлгэ ороод байна. Тиигэжэ декабриин 13-да проектнүүдаа комиссиин урда хамгаалагдаха юм. Эндэ шалгарһан түсэлнүүд мүнгэн хангалтада хүртэхэ аргатай болохо.
Урилдаанай дүрим тухай мэдээсэл http://vk.com/fondnaidal табигданхай.
Декабриин 6-да Буряад хэлэнэй багшанарай эблэл Хориин 1 дугаар дунда һургуулида һурагшадай аман хэлэ хүгжѳѳхэ онол забаряар зүүн аймагуудай багшанартай семинар үнгэргэхэ гэжэ байна. Энэ семинар хадаа багшанарай мэргэжэл дээшэлүүлхэ, дүй дүршэлѳѳрѳѳ хубаалдаха зорилго урдаа табина. Суглаанда Буряад Уласай Засагай газарай ажалшад, Багшын колледжын багшанар, «Бэлиг» хэблэлэй мэргэжэлтэд хабаадалсаха. Семинарта нээмэл хэшээлнүүд, мастер-классууд, ном һударай үзэсхэлэн болохо юм байна.
