Үсэгэлдэр Улаан-Үдын Соведүүдэй талмай дээрэ Буряад уласай аймагуудта түймэр сардаг машинанууд дамжуулагдаба

Энэ хэмжээ ябуулгада Буряад Уласай Засагай газарай Түрүүлэгшын аюулгүй байдал сахиха асуудалнуудай талаар орлогшо Пётр Мордовской хабаадалсаба.

АЦ-40 түхэлэй түймэр сарадаг табан машина Буряад уласай түймэр сарадаг албанай материальна бааза бэхижүүлхэ зорилготой абтаһан байна. Энэ хэрэгтэ 27 сая түхэриг гаргашалагдаа.

«Буряадай газар дайда, ажаһуугшадые аршалха, тэдэнэй аюулгүй байдалай талаар асуудалнууд Буряад Уласай Толгойлогшо Алексей Цыденовэй хиналта доро байдаг. Захаамин, Кабанск, Мухаршэбэр, Ярууна, Хори аймагуудта түймэр сарадаг машинануудые дамжуулга хадаа түүхэтэ үйлэ хэрэг болоно. Табан нютагай засагай байгууламжануудта түймэр саралгын техникэ дамжуулагдажа, гал аюулай ушарбал, түймэр сарагшад хэзээдэшье өөрынгөө уялгаяа дүүргэхээр бэлэн гэжэ мэдэнэб», - гэжэ Буряад Уласай Засагай газарай Түрүүлэгшын аюулгүй байдал сахиха асуудалнуудай талаар орлогшо Пётр Мордовской хэлэбэ.

Түймэрэй гарабал, тэрэниие сараха хэрэгсэлнүүдээр эдэ машинанууд хангагданхай. АЦ-40 гэһэн түхэлэй машина гэр, байшангуудта гараһан түймэр сараха, гал аюулай газарта түйсэр сарагшадые буулгаха, абаралгын болон түймэр унтарааха хэрэгсэлнүүдтэй юм.

2018 оной бюджедэй түсэлдэ үшөө табан түймэр сараха машинануудые худалдан абаха гэжэ хараалагданхай.