Үнгэрһэн долоон хоногой туршада Буряад Уласай Толгойлогшо Алексей Цыденов гүрэнэй ниислэл хотодо албанай хэрэгүүдээр уулзалгануудые үнгэргэбэ

Ородой Холбоото Уласай гүрэнэй хилэ тааруу болгохо федеральна агентствын толгойлогшо Леонид Бершанский гэгшэтэй уласай хүтэлбэрилэгшэ уулзажа, «Хяагта» гэһэн автомашинаар хилэ гараха олон зуруудтай пунктда барилгын, һэльбэн шэнэдхэлгын ажал эршэдүүлхэ тухай хэлсэбэ.

Ородой Холбоото Уласай Мүнгэн һангай яаманда Алексей Цыденов уулзалгануудые үнгэргэбэ. Мүнгэн һангай сайдай орлогшо Андрей Ивановтай 2019-2020 онуудта Улаан-Үдэдэ сэбэрлэлгын түхеэрэлгэнүүдые барилгада мүнгэ һомололгын асуудалнуудаар зүбшэбэ. Тиихэдэ Мүнгэн һангай сайдай орлогшо Антон Котяковтой уулзажа, онкологиин түбэй барилга дүүргэхэ талаар уласай хүтэлбэрилэгшэ хэлсэһэн байна.

Улаан-Үдэдэ перинатальна түбэй ажалаа эрхилхэ тухай асуудалнуудаар Алексей Цыденов Ородой Холбоото Уласай Засагай газарай Түрүүлэгшын орлогшо Ольга Голодец болон «Ростех» гэһэн гүрэнэй корпорациин толгойлогшо Сергей Чемезов хоёртой зүбшэбэ. Тиихэдэ октябриин 27-до түсэлэй дансануудта заһабари оруулха, барилгын-хабсаралгын ажалнуудые эршэдүүлхэ болон бусад асуудалнуудаар зүблөөндэ Буряад Уласай хүтэлбэрилэгшэ хабаадаһан байна.

Алексей Цыденов албанай хэрэгүүдээр ниислэл хотодо ябахадаа, Ородой Холбоото Уласай Байгаалиин нөөсэнүүдэй болон байгаали хамгаалгын яаманай дүрбэн зүблөөнүүдтэ хабаадалсаа. Зүблөөнэй үедэ «Байгал хамгаалга болон Байгалай хизаарта ниигэмэй-эдэй засагай хүгжэлтэ» гэһэн федеральна программын бэелүүлгэ, бог шорой арилгаха, ой тайгын байдал болон Байгалай хизаарта ажахы ябуулха талаар нормативна-эрхын талаар гуримшуулха тухай хэлсэгдэһэн байна. Тиихэдэ Ородой Холбоото Уласай Барилгын болон гэр байрын ажахын сайдай орлогшо Елена Сиэррын ударидалга доро Улаан-Үдэдэ сэбэрлэлгын түхеэрэлгэнүүдые һэльбэн шэнэдхэхэ асуудалаар зүблөөн үнгэрөө.

Ородой Холбоото Уласай Юрэнхылэгшын туһалагша Андрей Белоусовтой Буряад Уласай Толгойлогшо Алексей Цыденов уулзалгануудые үнгэргэжэ, Ородой Холбоото Уласай Газарай кодексдо хубилалтануудые оруулха тухай хэлсэбэ. Тэрэнэй ашаар Байгалай хизаарта газар ашаглаха талаар хизаарлалта абтаха.

Буряад Уласай Толгойлогшо болбосоролой шанар хэр зэргэ гээшэб гэһэн асуудалаар «Авторская школа «Эврика-2017» гэһэн Можо хоорондын хуралдаанда хабаадаба. Тиихэдэ Ородой Холбоото Уласай спортын барилдаанай Федерациин хүтэлбэрилэгшэдтэй Алексей Цыденов уулзажа, эхэнэрнүүдэй барилдаа хүгжөөхэ программа бэелүүлгын асуудалнуудаар болон улас дотор спортын тусхайта түб байгуулха тухай хэлсэһэн байна.