Буряад Уласай 9 аймагта болон Уласай хүүгэдэй клиникын больницада түргэн туһаламжын арбан машина дамжуулагдаха.
Буряад Уласта элүүрые хамгаалгын һалбари хүгжөөхэ гэһэн гүрэнэй программаар уласай бюджедһээ мүнгэн һомологдожо, 31, 5 млн. түхэригтэ автомашинанууд худалдан абтаба. Уласай Элүүрые хамгаалгын яаман аймагуудай эмнэлгын эмхи зургаануудаар эдэ машинануудые тарааһан байна. Гусиноозёрк, Загарай, Ивалга, Хэжэнгэ, Хори, Мухаршэбэр, Түнхэн, Тарбагатай, Байгал шадарай аймагай түб больницануудта «В» классай 9 машина дамжуулагдаха. Оньһон түхеэрэлгэнүүдээр хангагдаһан, үхибүүдтэ эмнэлгын түргэн туһаламжа үзүүлхэ «С» классай нэгэ реанимобиль Уласай хүүгэдэй клиникын эмнэлгын газарта үгтэхэ. Энэ машина 8 миллионһоо дээшэ сэнтэй байба.
2017 оной дүүрэтэр федеральна бюджетһээ мүнгэн һомологдожо, Буряад Уласта түргэн туһаламжын машинануудые үшөө худалдан абахаар түсэблэгдэнхэй.
По информации пресс-службы правительства Бурятии
