Энэ хэмжээ ябуулгада долоон дунда мэргэжэлэй һургуулинуудай 20 гаран оюутан хабаадаа гээд хэлэлтэй. Буряадай суута уран зохёолшодой Цырендулма Дондогойн, Дамба Дашанимаевай, Матвей Чойбоновой шүлэгүүд зэдэлээ. Мүн тиихэдэ Намжил Нимбуевай, Санжай-Ханда Дармаевагай, Ким Цыденовэй болон Лопсон Гергеновэй найруулгануудые хабаадагшад уран һайханаар уншаа. Гадна өөрынгөө зохёоһон шүлэг уншаха дуратайшуулай байһаниинь һайшаалтай.
Багшанарай колледждо хүршэ болохо Буряадай Үндэһэтэнэй 1-дэхи лицей-интернат һургуулиин шабинар уран гоёор шүлэгүүдые хэмжээ ябуулгын эхиндэ найруулба. Мүн тиихэдэ жюриин түрүүлэгшэ, Россиин габьяата артистка Должин Тангатова Цырендулма Дондогойн шүлэг уншажа, баяр ёһололой эхи табиба.
- Һүүлэй үедэ залуушуулнай түрэл буряад хэлэн дээрээ хөөрэлдэдэг болоо. Нэгэ сагта хөөрэлдэхэһөө байха ганса нэгэ үгэ хэлэхэеэ эшэдэг болоод байгаа бэлэй, - гээд Должин Тангатова хөөрэнэ. - Ехэ һонирхожо шагнааб, харааб. Хүүгэд бэрхэ байһанаа харуулаа. Баһа багшанартань баяр хүргэхэ хэрэгтэй, тэдэнэй ашаар лэ түрэл хэлэеэ залуу һүрэгнай шудалжа ябана гэбэл, алдуу болохогүй.
Шүлэг уранаар уншаха гээшэ бэлэн хэрэг бэшэ ааб даа. Тэрэ шүлэгэйнгөө удхые гаргажа шадаха, юун тухай уншажа байнабши гэжэ ойлгохо хэрэгтэй. Булта юумэнһөө айнгүйгөөр, сэдьхэл зүрхөө хүдэлгөөд, үнэн зүрхэнһөө буряад хэлэн дээрэ уншажа гарабал даа.
“Эрмэлзэл”, “Уран уншалгын дүршэлэй дээжэ” болон “Уран найруулгын баялиг” гэһэн гурбан номинацида илагшад тодороо. Тиигэжэ гурбадахи һууринуудые Анжела Налханова (аграрна колледж), Валентина Нисюркеева (багшанарай колледж) болон Сэсэг Буянтуева (медицинскэ колледж) эзэлээ. Эндэ Валентина Нисюркеева буряад яһанай басаган бэшэшье һаа, суута Дамба Дашанимаевай мэдээжэ “Тоёон” гэһэн шүлэгые тон уранаар уншаа.
Светлана Эрдынеева (Багшанарай колледж), Абида Санданов (аграрна колледж) болон Аюна Цыденова (хүгжэмэй колледж) хоёрдохи шатын димпломуудые абаа.
Мария Очирова ба Аяна Жамсаранова (худалдаа наймаанай- экономическа техникум) болон Амарсана Нимаева (багшанарай колледж) нэгэдэхи һуурида гараа.
Харин мүрысөөнэй гол шан болохо Гран-придэ Чайковскиин нэрэмжэтэ хүгжэмэй колледжын оюутан Намжилма Цыбикова хүртэбэ.
Тус хэмжээ ябуулгада багшанарай колледжын оюутад һайнаар бэлдэжэ гараа гээд хэлэхэ шухала. Тэндэ аза талаан ехэтэй хүбүүд, басагад һурадаг байна. Мүрысөөнэй үедэ забһарлалай гарахадань, сугларагшадые гоё хатарнуудаар, хонгёо дуунуудаар һуралсалай гуламтын оюутад хужарлуулаа. Мүн тиихэдэ тэдэ һонирхолтой хүгжэмэй-уран зохёолой композици бэлдэжэ, олоной һайшаалда хүртөө, дуулгаха «Буряад Унэн».
